ROXAS CITY – Wala mapunggan ni Mayor Katherine ‘Kit’ Belo nga maghatag sang pahayag sa pila ka mga nagalagaw nga istorya sa banwa sang Panit-an nga siya ang nagpa-untat sang caravan sang ‘team pulahan’ sa banwa sang Panit-an, kahapon nga adlaw.
Sa interview sang Bombo Radyo kay Belo, ginpahayag sini nga indi siya ang nagpauntat sa caravan nga ginpatigayon sang nagapadalagan man sa pagka-alkalde sang amu nga banwa nga si Joy Moskal, kundi ang mga katapo sang kapulisan.
Gindugang pa sang incumbent Mayor nga wala man sini ginmanduan ang mga kapulisan, kundi nakahibalo ang mga katapo sang Panit-an MPS sang layi nga ginlapas sang mga pulahan.
Ginpahayag man sang alkalde nga kinahanglan sundon ang layi, rason nga nagproseso man ini sang permit, apang ang pihak nga grupo, wala nakaproseso sang permit, rason sa pagpauntat sang ila caravan.
Ginsiling man sang alkalde nga wala ini sang kinamatarong nga magbalibad kun nag-apply sang permiso ang pihak nga kampo, kag mahimo gid sila makapatigayon sang caravan sa masunod nga mga inadlaw.
