ROXAS CITY – Arestado ang isa ka menor de edad nga lalaki, matapos nga ginserbehan sang warrant of arrest sang mga katapo sang Panay kag Sigma Municipal Police Station, Provincial Intelligence Unit (PIU) kag Capiz CTG trackers sang Capiz Police Provincial Office, sa Barangay Agbalo, banwa sang Panay.
Kaso nga paglapas sa Section 3 sang Republic Act (RA) 10883 ukon “Anti Carnapping Act of 2016” ang ginapangatubang sang menor de edad, kun sa diin ginrekomendar sang Korte ang P120,000 nga kantidad bilang piyansa para sa temporaryo nga kahilwayan sini.
Ginpirmahan kag gin-isyu ang warrant of arrest ni Hon. Rommel Lacson Leonor, presiding judge sang Regional Trial Court (RTC) 6th Judicial Region, Branch 21, Mambusao, Capiz, napetsahan Enero 31, 2023.
Matandaan nga sang nagligad nga Nobyembre 2022, nadakpan sa akto ang ginpahayag miyembro sang ‘tun-og group’ nga nagpangawat sang spare parts sang motorsiklo sa banwa sang Panay kag Pontevedra.
Ginakabig man nga Top 2 most wanted person municipal level, ang wala na ginhingadlan nga Child in conflict with the law (CICL).
