Patay ang isa ka menor de edad sa nagluntad nga pagbungguanay sa tunga sang motorsiklo kag tricycle sa Barangay Agdahon, Cuartero, Capiz.
Ang wala na ginhingadlan nga biktima ang nagapang-edaron sang 14-anyos kag residente sang nasambit nga barangay.
Sa nakuha nga impormasyon sang Bombo Radyo nagikan sa Cuartero Municipal Police Station, ginapahayag nga sakay ang biktima sa top down nga tricycle nga ginamaneho ni alyas Ken, 20-anyos. Ginaalegar nga ginlikawan sang top down ang lubakon nga dalan, rason nga aksidente ini nga nagbunggo sa kasugata sini nga motorsiklo nga ginamaneho naman sang isa ka 15-anyos nga menor de edad.
Gin-apok sa dalan ang solterito kag nag-angkon sang patal nga pilas sa ulo nga gilayon naman nga ginpadangat sa ospital apang gindeklarar naman nga dead on arrival sang nag-atendir doktor.
Sa karon, padayon pa ang ginahiwat nga imbestigasyon sang mga kapulisan sa nasambit nga aksidente.
