Nagdangat sa 374 tanan ka mga aspirant candidates ang naka-file sang Certificate of Candidacy (COC) sa bilog nga probinsya sang Capiz, base sa datos nga nabalhag sang Capiz Police Provincial Office (CPPO).
Sa interview sang Bombo Radyo kay PCOL. Albert Tapulao, Police Director sang Capiz Police Provincial Office, may tig-tatlo ka mga kandidato sa pagka-gobernador, bise gobernador kag House of Represantives. Samtang, naman 16 diri ang nag-file sang pagka-board member nga kun sa diin 9 ang nabalhag sa 1st district kag 7 naman sa 2nd district sang Capiz.
Samtang, sa municipal level positions naman, 39 sa mga ini ang magapapili sa pagka-Mayor, 31 sa pagka-vice mayor kag 279 tanan sa pagka-konsehal sa nagkalain-lain nga kabanwahan lakip ang syudad sang Roxas.
Dugang pa sini, masadya ini sa nangin resulta sang nasambit nga kahiwatan bangud nangin matawhay kag madinalag-on ang pagpatigayon sang 8 ka adlaw nga filing sang certificate of candidacy (coc) sa nagkalain-lain nga talatapan kag venue sang Commission on Elections (Comelec) sa bilog nga probinsya sang Capiz.
