ROXAS CITY -Ginpanindugan sang chairman sang Committee on Transportation and Public Utilities sang Sangguniang Panlungsod nga preparado na ang tanan nga mga plano sang syudad sa mga nagabiyahe nga mga tricycle sa syudad antes pa nagpadala sang petisyon ang Capiz Tricycle Drivers, Operators and Alliance (CTODCA).
Ginpahayag ni City Councilor Albert Gregory Potato nga natalana sini nga
amyendahan ang City Ordinance No. 19 ukon ang “Number Coding Scheme” nga ginpapasar sang konseho.
Suno kay Potato nga natalana nga igapatuman sa maabot nga Hunyo 1, 2020 ang “Odd-Even Scheme” sa diin maka apat na ka beses nga makabiyahe ang mga tricycle nga nagabiyahe sa syudad.
Gindugang pa sini nga striktuhon ang mga tricycle drivers nga magpaskil sang taripa sa mga ginabiyahe nga tricycle agud malikawan ang pagpanukot sang mahal sa mga pasahero.
Samtang natalana naman nga ipanagtag sa mga tricycle drivers kag mga operators ang ayuda nga ginpa-in sang syudad.
Suno kay potato nga makabaton sang ayuda gikan sa lokal nga gobyerno sang syudad ang mga tricycle drivers kag mga operators nga wala makabaton sang social amelioration program (SAP).
Nagpanugyan man ini sa mga pasahero nga ginasukot sang mahal sang pila ka mga tricycle driver nga magreklamo sa talatapan sang Traffic Management Unit (TMU) agud gilayon ini nga maaksyonan.
