ROXAS CITY – May yara na sang mga person of interest ang mga kapulisan sa pagpangawat sa isa ka balaligyaan sang cellphones sa Villareal Highway, Barangay Poblacion Tabuc, banwa sang Mambusao.
Ini ang ginkumpirmar ni Police Staff Sergeant Ivan Camacho, imbestigador sang Mambusao Municipal Police Station sang mapakig-angutan sang Bombo Radyo.
Suno kay Camacho, ang ginalantaw nila nga responsable sa pagpangawat amu man ang mga suspek sang nagliligad nga pagkinawatay nga nagluntad sa nasambit nga banwa.
Ginpahayag man sini, ang natabo sa karun ang makabig nga pinakadako nga rubbery incidents sa banwa sang Mambusao.
Matandaan nga yara sa P958,765 ang kabug-usan nga kantidad sang mga nagkaludula nga items.
Dugang pa ni Camacho nga may yara man sang Closed Circuit Television (CCTV) ang ginkawatan nga balaligyaan apang ginapatay ini antes magpauli ang mga empleyado.
Ginpahayag man ni Camachu, nga ginpa-block na sang tag-iya sang balaligyaan ang mga cellphones agud kun ibaligya sang mga kawatan indi na ini ma-open.
Nagapangayo man sang bulig ang Mambusao PNP sa mga residente sa amu nga banwa nga kun sin-o man ang mabaligyaan sang cellphone ang makig-angut lang sa ila talatapan agud madakpan na ang mga persona nga responsable sa pagpangawat.
