ROXAS CITY – Padayon ang imbestigasyon sang sang Roxas Component City Police Station sa pagluthang-patay sa isa ka negosyante sa Barangay IX, Roxas City.
Ang biktima amo si Rogelio Buaron kag residente sang banwa sang Panay.
Sa interview sang Bombo Radyo Kay Police Lieutenant Colonel Ricardo Jomuad Jr., Hepe sang Roxas Component City Police Station, iya ginpahayag nga base sa ila inisyal nga imbestigasyon, nagatindog sa higad sang karsada ang biktima samtang may gina-istorya sang hinali lang nag-abot ang riding in tandem kag ginluthang sang makapila ka beses ang biktima nga naigo sa nagkalain-lain nga bahin sang iya nga lawas.
Suno kay Police Lieutenant Colonel Jomuad, gindala pa sa ospital ang biktima apang gin-deklara nga dead on arrival.
Pahayag pa niya, posible may kaangtanan sa negosyo ang rason sang pagpatay sa biktima.
Sa karun, padayon ang backtracking sang ila talatapan sa mga CCTV sa gintabuan sang insidente kag nagapatigayon sang checkpoint sa nagkalain-lain nga kabanwahanan sa probinsya sang Capiz.
Nagapanawagan man ang natungdan sa publiko sa mga nakatalupangod ukon may impormasyon sa mga suspek , nga magpakig-angut sa talatapan sang Roxas Component City Police Station agud gilayon nga madakop kag mapanabat ang may kahimuan sang krimen.
Interviewed by: Bombo Sunnie Mae Batencila via Bombohanay sa Udto
