Mangin sentro sang masunod nga hearing sang three-panel House Infrastructure Committee (InfraComm) sa Martes, Setyembre 9 may kaangtanan sa ginapahayag anomalya sa flood control projects amo ang mga kumpaniya nga konektado sa Discaya nga nagbulsa sang binilyon ka pesos nga kontrata sang gobyerno.
Suno kay panel co-chairperson kag Bicol Saro Party-list Representative Terry Ridon, pagatutukan nila ang mga proyekto nga nakuha sang Discaya, ang mga corporate structures kag ang pamaagi sang ila pagpakigbahin sa mga biddings.
Ginpahayag sang mamalidha nga ang mga kontraktor nga mapaslawan sa pagsunod sa subpoena ang gamiton sa pag-hold sa ila sa contempt kun sa diin mahimo sila nga arestuhon kag dal-on sa komitiba.
Samtang, ginalauman man nga istoryahan sang komitiba ang pagsulod sang P96 million nga flood control project sa Plaridel, Bulacan nga ginkontrata sang Wawao Builders apang sang ulihi nangin ghost project.
Ginpahayag sang mamalidha nga posible ginsulod sang katapo sang Kamara ukon Senador ang proyekto sa tunga sang bicameral conference committee para sa 2024 national budget.
Bangud sini, posible man suno sa iya nga ipatawag sa committee hearing ang mga miyembro sang bicam nga nag-ratify sang 2024 General Appropriations Act (GAA) sa masunod nga mga semana.
