ROXAS CITY – Na-istoryahan sa pagsinapol sang Kamara ang pagsuspendi sa excise tax sang produktong petrolyo.
Ini ang ginpahayag ni Cong. Presley de Jesus, Vice-chairperson sang Committee on Energy sa Kamara sang ma-interview sang Bombo Radyo.
Suno kay De Jesus, nga ini lang ang pamaagi nga mahimo sa karun samtang nagapadayon pa ang kinagamo sa tunga sang Ukraine kag Russia.
Ginpahayag sini, nga kun madayon ang ila emergency meeting angut sa sini nga isyu, isa siya sa maga-boto nga temporaryo nga suspendihon ang excise tax agud mabuhinan ang kabudlay nga ginapangatubang sang kadam-an sa karun.
Dugang pa ni De Jesus, kun matabo nga temporaryo nga i-suspendi ang excise tax, dako man ang mabuhin sa presyo sang gatong kag dako ang impact sini sa mga pumuluyo.
Ginsiguro man sini nga madamo ang magapabor nga mga Kongresista sa pagsuspendi sang excise tax bangud tanan diri ang makabenepisyo.
