ROXAS CITY – Ginpaathag sang pamunuan sang Land Transportation Office (LTO) Capiz ang mangin pagsulundan sa pagpatuman kag mga mahimo makonsiderar sa ila nga ‘bawal angkas’ policy.
Sa interview sang Bombo Radyo kay LTO-Roxas City District Head STRO Henry Melocoton, ginpahayag sini nga nagpadala na siya sang sulat LTO Assec. Edgar Galvante angut sa posible liwat nga pagkunsiderar sang ahensiya sa kontrobersiyal nga polisiya.
Ini kasunod sang pag-ulan sang mga pagpakamalaut kag pagpamalabag sang mga motorista sa nasambit nga pagsulundan kag pagpatawag kay Melocoton sa sesyon sang Sangguniang Panlalawigan bangud sa nasambit nga isyu.
Ginpahayag ni Melocoton nga sa amo nga sesyon nakasugtan nga ipaiway anay ang nasambit nga pagsulundan para sa mga ‘immediate’ kag ‘legal’ family members.
Suno diri nga padayon gihapon ang mga deputized agents sang ahensiya sa pagsita sa mga motorista kun sa diin sila ang paga-usisaon kag pangitaan sang mga legal nga dokumento nga makapamatuod nga ila pamilya ang ila nga kaangkas.
Sa pihak nga wala pa sang guidelines natuhoy sa pagabag-uhon sa nasambit nga pagsulundan suno sa opisyal, magadihon sang isa ka resolusyon ang Capiz provincial board para diri.
Mahibaluan nga sa sesyon sang provincial board, nangin matigdas ang panindugan sang mga mga miyembro sang konseho nga ipaiway ang nasambit nga pagsulundan bangud may mga kabanwahanan sa probinsiya, ilabi na ang mga yara sa nabukid nga porsyon, nga motorsiklo gid lamang ang ila nga ‘mode of transportation’.
