ROXAS CITY – Gintupok sang kalayo ang pila ka mga lungon sa De Jesus Funeral Homes sa banwa sang President Roxas, Capiz.
Ang nasambit nga punerarya ang ginapanag-iyahan ni Mike Jimenez nga human sa mixed-materials.
Suno sa caretaker nga si Wilbino Andrada, wala sila sang nasalbar nga mga kagamitan bangud halos gintupok na sang kalayo ang balay sang nag-abot ini.
Ginpahayag pa sini nga magluwas sa mga lungon, nasunog man ang isa ka motorsiklo kag ang likod nga porsyon sang salakyan.
Suno naman kay Donna Biaco, nakibot na lamang ini sa iya pagguwa sa CR sang nakit-an nga ginalamon na sang kalayo ang ikaduha nga panalgan nga ila ginatulugan.
Sa baylo nga magpanghimos sang kagamitan, gin-una sini sang salbar ang mga kabataan nga sadto nagapanago sa idalom sang lamesa bangud sa tuman nga kahadlok.
Posible nga nagikan ang kalayo sa guba nga linya sang kuryente bangud may nakit-an ini nga nagsigrab sa ila wiring.
Suno naman kay FO1 Elmer Acolentaba, Jr. sang President Roxas Municipal Fire Station, agud indi na maglapta pa ang kalayo, ginpakamaayo nila nga magpangayo sang responde sa mga municipal fire stations sa kaiping nga mga kabanwahanan.
Sa karon ginabulubanta nagalab-ot sa P200, 000 ang inisyal nga kahalitan sang sunog kag padayon pa ini nga gina-imbestigaran sang mga otoridad.
