ROXAS CITY, CAPIZ – Napasakaan na sang kaso nga paglapas sa Republic Act 9165 ukon Comprehensive Dangerous Drugs Act of 2002 ang tatlo ka indibidwal nga nadakpan sa operasyon sang Philippine Drug Enforcement Agency – Capiz sa Barangay Binuntucan, Pontevedra, Capiz.
Sa interview sang Bombo Radyon kay Agent Ramir Batuigas, Provincial Officer sang PDEA – Capiz, nagpositibo sa drug test ang mga nadakpan.
Matandaan nga ang mga naaresto amo sanday alyas Dodoy, 45-anyos, residente sang nasambit nga lugar; Glenie Bolaño, 44-anyos, residente sang Brgy. Pantalan, President Roxas, Capiz; kag Noel Detaro, 40-anyos, residente naman sang Brgy. Lantangan, Pontevedra, Capiz.
Nakuha sa posisyon sang mga nadakpan ang 16 tanan ka sachets sang suspected shabu nga ginabanta yara sa masobra P100,000 ang balor kag may kabug-aton nga mas ukon menus 50 gramos.
Lakip man sa narekober ang P500 nga marked money, digital weighing scale, kag mga drug paraphernalia.
Sa karon, nagapabilin ang mga ini sa kustodiya sang PDEA Regional Office sa Iloilo para sa nagakaigo nga disposisyon.
