ROXAS CITY – May yara na sa karon sang kabug-usan nga 136 ka mga locally-stranded individuals (LSI’s) ang nakapauli sa probinsiya sang Capiz.
Ini ang ginkompirmar mismo ni Capiz Provincial Disaster Risk Reduction and Management Office (PDRRMO) Head Judy Grace Pelaez sang mainterview sang Bombo Radyo.
Suno kay Pelaez, humalin sang nagsugod ang pagpapauli sa mga LSI’s gikan sa iban nga mga kaprobinsiyahanan, 34 ang nakapauli sa banwa sang Mambusao; 20 sa Panitan; 11 sa Dumarao; 3 sa Sigma; 14 sa Roxas City; 18 sa Cuartero; 19 sa Dao; 14 sa Panay kag tag-1 sa Jamindan, Maayon kag Sapian.
Ang ini nga mga indibidwal suno kay Pelaez ang lunsay ginpaidalom sa rapid testing kag nag-negatibo.
Padayon sa karon ang quarantine period sang nasambit nga mga LSI’s kag hugot nga gina-monitor sang tagsa ka mga local government units (LGU’s).
Ginkompirmar man ni Pelaez nga may mga LSI’s nga naka-facility quarantine, strict home quarantine kag home quarantine.
Sa Martes nga adlaw, Mayo 19, magaabot ang dugang nga mga LSI’s kun sa diin 15 diri ang taga-Sigma; 23 ang taga-Sapian; 20 ang taga-Pontevedra; kag 15 ang taga-Panitan.
Sa Miyerkules nga adlaw, Mayo 20, may magaabot man nga mga LSI’s nga mga residente sang Mambusao, Dumarao kag Pilar.
Ang nasambit nga mga LSI’s ang gikan sa kaiping nga mga kaprobinsiyahan kalakip ang Iloilo kag Aklan.
Ginkompirmar man ni Pelaez nga may mga LSI’s gikan sa iban pa nga parte sang Pilipinas nga nagalab-ot sa halos isa ka libo nga padayon pa nga ginahitsu sang talatapan.
May mga magaabot suno diri nga mga LSI’s nga na-stranded matapos nagbakasyon sa Palawan kag grupo sang mga estudyante gikan sa University of the Philippines (UP) Los Baños.
