Nagdangat na sa 132 ang numero sang mga tawo nga napatay sa maduguon nga raid sang mga kapulisan sa lugar sang Alemão kag Penha sa Rio de Janeiro, Brazil, suno sa public defender office sang pungsod.
Suno sa report, ini na ang pinakamaduguon nga operasyon sa kasaysayan sang syudad kun sa diin kapin sa doble sang nauna nga report nga may 58 ka casualties.
Ginkumpirma ni Governor Cláudio Castro nga padayon pa nga ginausisa sang mga forensic experts ang ginreport nga casualties kag dugang pa sini nga kadam-an sa mga napatay sa operasyon ang mga katapo sang sindikato.
Ginpakamalaot sang United Nations Human Rights Office ang operasyon kag ginpahayag nga tuman ang ila kakibot sa kadakuon sang kalakasan.
Ginapahayag naman ni Brazil President Luiz Inácio Lula da Silva nga siya mismo ang nakibot kag naghinulsol bangod wala sila ginsugiran nahanungod sa daku nga operasyon.
Suno sa mga otoridad, target sang operasyon amo ang Red Command nga isa ka kilala nga sindikato nga nagabaligya sang iligal nga droga.
Kaangot sini, apat (4) ka mga kapulisan ang nalakip sa mga napatay sa nasambit nga operasyon.
Matandaan, natabo ang raid pila ka adlaw antes ginhiwat sa syudad ang C40 World Mayors Summit kag Earthshot Prize nga pagatambungan ni Prince William sang United Kingdom.
