ROXAS CITY-Padayon nga gindagsa sang mga pumuluyo ang pila ka mga pribado kag pampubliko nga sementeryo antes ang adlaw sang pagsirado sini humalin subong nga adlaw tubtob sa Nobyembre 5 sini nga tuig.
Sa pagsekyar sang Bombo Radyo sa mga sementeryo sa siyudad sang Roxas kagab-e, may mga indibidwal pa nga naghingagaw padulong sa sementeryo agud magsindi sang kandila kag maghalad sang bulak sa lulubngan sang mga nagtaliwan nila nga mga himata.
Magluwas diri may yara man sang mga indibidwal nga naghingagaw paninlo sa mga musuleo kag pantyon sang ila mga nagtaliwan nga himata.
Sa interview sang Bombo Radyo sa kay Rey Apuyo sang Barangay Milibili Roxas City nga ginpakamaayo sini nga magsindi sang kandila sa pantyon sang iya amay sa Divine Jesus Memorial Park sa tion sang kagab-ehon bangud matawhay na ang sitwasyon sa amo nga sementeryo kag agud masunod suno diri ang social distancing.
Suportado man sini ang pagpasirado sang mga sementeryo humalin subong nga adlaw agud malikawan ang paglapta sang virus.
Aminado ini nga madamo ang namag-o sa subong nga pagsulundan bangud ginkaangdan na sang kadam-an nga sa adlaw mismo sang Undas, nagapadulong sa patyo ang mga luyag magsindi sang kandila sa mga minanatay.
Samtang ginpasiguro naman sang pamunuan sang Divine Jesus Memorial Park nga hugot nga ginpatuman ang mga health protocols antes magsulod sa sementeryo.
Suno sa kay Anthony Horario, Security Guard sang amo nga patyo nga antes magsulod ang indibidwal sa nasambit nga sementeryo, ginapasulat sila sa log book para contact tracing sa ulihe.
Ginlimitaham man suno diri ang pagsulod sang mga indibidwal nga luyag magbisita sa pantyon sang ila nagtaliwan nga himata.
