ROXAS CITY – May tagsa-tagsa ka pamaagi ang mga pumuluyo sang Barangay Banica, Roxas City agud matapna ang pagduging sang lamok kag makalikaw sa balatian nga dengue.
Ini ang nahibaluan sa ginpatigayon nga Bombo Patrol 101 sa Barangay sang Bombo Radyo.
Suno kay Lyn Dayo sang Urban Poor, adlaw-adlaw ini nagapaninlo sa ila palibot agud indi magduging ang lamok.
Gina-ula man sini ang mga ginateniran sang tubig kag ginapakulob ang mga bagay nga posible pangitlugan sang lamok.
Ginpahayag naman ni Teresita sang Sitio Carmel nga agud makalikaw sila sa balatian nga dengue, disiplinado sila sa paghaboy sang ila basura kag pagtinlo sang ila palibot.
Nagapati ini nga kinahanglan nila magbuligay sang iya mga kasilingan agud maamligan ang ila ikaayong-lawas batuk sa amo nga balatian.
Luyag naman ni Nanay Hershel sang New Road nga masolusyunan ang problema sa ila lugar sa barado nga tubig ilabi pa kun magbubo ang mamunog nga ulan.
Suno diri nga wala halos nagahubas ang tubig sa amo nga lugar gani nagakadapat na ini nga matambakan.
Suno naman kay Manang Mylene sang Sitio Tulay, mas nangin mahinalungon sila matapos nagpositibo sa dengue ang iya anak.
Ginpahayag sini nga nagadap-ong ini kada hapon agud matabog ang mga lamok kag ginapagamit sang mosquito repellant ang iya kabataan agud indi pagkututon sang lamok.
