ROXAS CITY – “Indi magatapos sa isa ka hinun-anon ang pagtaas sang insidente sang suicide bangud ini dako nga tikang sa pagsugod sang pagbinuligay agud mapahagan-hagan kag masulbar ang problema.
Ini ang ginpahayag ni Mayor Ronnie Dadivas sa ginpatigayon nga 1st Consultative Meeting on Suicide Crisis nga ginpangunahan sang Roxas City Government kag gintambungan sang representante sang DOH, Provincial Health Office, City Health Office, PNP, Sangguniang Panlungsod,Liga ng mga Barangay, SK Chairmans, DepEd, Religious sectors, Muslim Community, kag academe.
Sa nasambit nga sinapol guinpamatian ang ginpresentar nga solusyon sang nagkatuhay nga sektor agud tuldukan ang krisis.
Kalakip diri ang paghanas sang mga peer educators kag manunudlo sa counselling subongman pag-angkon sang establisidado nga Crisis Center.
Kalabanan sa biktima sang suicide ang mga pamatan-on nga naga-edad 14 tubtob 20 anyos rason nga dako ang papel sang eskwelahan sa paggiya sa ila estudyante mangin sa emosyunal nga aspeto.
Ginpangabay man ang mga barangay official’s nga mangin mabinantayon sa sitwasyon sang ila mga nasakupan nga mahimo mangin paktor sang suicide.
Dako ang papel sang pamilya ilabi na sang mga guinikanan sa pagsiguro sang mapag-on nga relasyon sa ila kabataan nga sarang nila mapalapitan sa tion sang problema.
Guinpahayag naman sang religious sector nga ang pagtuo sa Diyos kag pagbasa sang bibliya ang pinakamabakud nga instrumento sa paglikaw sa suicide.
