ROXAS CITY – Nagpahanumdom ang Philippine Army sa mga pulitiko ukon sa ordinaryo nga tawo nga likawan kag untatan ang pagsuporta sa mga miyembro sang Communist Party of the Philippines-New People’s Army-National Democratic Front’s (CPP-NPA-NDF).
Sa interview sang Bombo Radyo kay Captain Kim Apitong, OIC – Spokesperson sang 3rd Infantry Division sang Philippine Army, ginsiling sini nga mahimo mapanabat sa idalom sang Anti-Terrorism Act Of 2020 ang bisan sin-o nga indibidwal nga nagasuporta kag nagapasugot sa gina-demand sang mga rebelde nga grupo.
Sa karon nga nagahilapit nga eleksyon, indi malayo nga pagagamiton ini nga kahigayunan sang mga rebelde nga grupo nga pangilkilan ang mga kandidato pinaagi sa mga ginatawag ‘permission to campaign.’
Nahibaluan nga may impormasyon ang mga katapo sang militar nga may mga lugar diri sa probinsya nga ginapugaran sang mga rebelde nga grupo kag ginakilkilan ang mga sibilyan.
Bangud sini, nagapanawagan ang mga suldado nga ipahibalo sa ila ang mga kaangay nga bulohaton sang mga rebelde nga grupo.
Padayon man ang ginapatigayon nga combat operation sang mga militar agud maprotektahan ang mga pumuluyo batuk sa CPP-NPA-NDF.
