Mister, patay matapos maaksidente ang ginamaneho nga motorsiklo sa mismo kaadlawan sang anak

ROXAS CITY – Patay ang 37 anyos nga mister matapos maaksidente sa iya ginamaneho nga motorsiklo sa Barangay Anhawon, Panay, Capiz.

Ginkilala ang biktima kay Ernie Diaz, 37 anyos, sang Barangay Agbanban sang amo man nga banwa.

Mahibaluan nga naggikan pa ang biktima sa kaadlawan sang iya anak kag padulong kuntani ini sa banwa sang Maayon.

Apang pag-abot sini sa nasambit nga lugar, nadulaan siya sang kontrol sa iya manibela kag bumunggo sa poste sang kuryente.

Ginapahayag nga nayupok gid ang agtang sang biktima nga nagresulta sang iya nga kamatayon.

Gindala pa ini sa ospital apang gindeklarar nga dead-on-arrival.