ROXAS CITY – Gintaban sang wala pa makilan-an nga mga kawatan ang motorsiklo nga naka-park sa Barangay Lanot, Roxas City.
Sa interview sang Bombo Radyo kay Rixzy Besa, 18-anyos, tag-iya sang motorsiklo, iya ginpahayag nga sadtong Sabado sang gab-i, Mayo 17, nagpadulong siya sa balay sang iya abyan sa nasambit nga barangay kag gin-park ang iya motorsiklo sa higad sang dalan.
Apang ginkakibot na lamang sini pagka-aga sang Dominggo sang mapauli na ini kuntani apang wala na ang iya motosiklo sa iya gin-parkingan
Suno kay Besa nga wala niya ginalauman nga kawaton ang iya motorsiklo bangud masami niya man ini nga ginabilin sa amo nga lugar kag madamo man ang naga-park sa amo nga area.
Sa karon, nagapanawagan si Besa sa kun sin-o man ang nakakita ukon posible nabaligyaan sang iya motorsiklo nga mahimo makig-angut sa ila barangay ukon sa mga kapulisan.
Nahibaluan nga nagaduag puti nga may green ang motorsiklo nga nadula kag pahayag pa niya nga mahupos lang ini paandaron gamit ang iban nga liyabe.
– With a report from Bombo Jessa Mae Delos Santos
