ROXAS CITY – Nalab-ot na ang limit sang healthcare system sa probinsiya sang Capiz sa padayon nga kampanya kontra coronavirus disease (COVID-19).
Ini ang ginpahayag ni Dr. Abundio Balgos, ang representative sang Inter-Hospital COVID-19 Committee Task Force kag President & CEO sang Health Centrum Hospital sang mainterview sang Bombo Radyo.
Ginpahayag sini nga sa nakaligad nga tatlo ka adlaw humalin sang temporaryo nga nag-untat sa pagbaton sang COVID-19 admission ang Designated Provincial COVID-19 Facility nga Roxas Memorial Provincial Hospital, nagbaton naman sang COVID-19 admission ang mga pribado nga ospital sa probinsiya.
Apang sa 69 nga COVID-19 bed capacity sang mga pribado kag pampubliko nga ospital, napuno naman ini sang mga COVID-19 patients kag suspects.
Makalaalarma ini suno kay Balgos gani kinahanglan nga hatagan anay sang kahigayunan nga ma-decongest ang mga ospital sa probinsiyal kag hulaton nga maka-discharge sang mga pasyente agud masaylo sa mga quarantine facility.
