Nagapanumbalik sa Dumalag Municipal Police Station bilang Officer in Charge si Police Major Cherryl M. Visto.
Sa interview sang Bombo Radyo sa nasambit nga pulis, iya ginpahayag nga igapatigayon nya ang natunaan na nga mga programa sa idalom sang iya nga pagdumalahan.
Si Police Major Visto ang pormal nga nanumbalik sa Dumalag Municipal Police Station sang Hunyo 16 sa sini nga tuig sa diin nga sa 13 diyas nya na nga pagpamuno, nakapagkit na ini sang pila ka mga accomplishments kaangay sang pagkadakop sang apat ka mga other wanted persons nga may mga kaso nga Reckless Imprudence Resulting to Physical Injuries kag Direct Assaults.
Subong man, antes nga nanumbalik sa pagpamuno sa amo nga police station si PMaj. Visto, nagikan anay sya sa Roxas City Police Station, Roxas City, Capiz, sa diin nagserbe ini bilang Deputy Chief of Police, Women and Children Protection Desk Officer kag Operation Officer.
Samtang, luyag sini nga ipadayon ang mga naumpisahan na nga mga programa sang iya nga pagpamuno sa hubon sang mga kapulisan sa amo nga banwa.
Sa pihak nga bahin, nagapadayon ang programa sang Dumalag Municipal Police Station sa kampanya kontra armas-luthang, mga ilegal nga aktibidad kag iban pa.
Nagapadayon man ang ila sini nga pakigkoordinar sa tagsa ka mga Barangay Anti-Drug Abuse Council (BADAC) sa tagsa ka mga kabarangayan sa banwa agud nga padayon nga mamonitor ang mga pumuluyo kun nagapatigayon na ini sang mga ilegal nga aktibidad kaangay sang paggamit ukon pagbaligya sang droga agud man nga timprano pa nga matapna kag padayon ang mga aktibidad may kaangtanan sa paghatag sang ihibalo sang mga pumuluyo agud mapabilin ang kalinong kag katawhay sa palibot.
Nagapasalamat namn si PMaj. Visto sa mga pumuluyo sang Dumalag sa pagbulig sa pagpabiin sang kalinong kag katawhay kag nagpasalig man ini nga ang ihatag gid sa mga pumuluyo ang serbisyo nga ila kinahanglan sa pagmentinar sang kalinong sa palibot.
