Nagdangat na sa masobra P2-B ang ginbilin nga halit sang Bagyong Kristine sa mga pampubliko nga eskwelahan sa bilog nga pungsod kung sa diin halos isa ka libo nga pasilidad sa elementarya kag high school nga kinahanglang kay-uhon.
Sa datos sang Department of Education (DepEd), yara sa 730 nga buluthuan ang nawasak bangud sa pagbaha samtang 34 naman nga kadam-an sa Bicol Region, ang gin-igo sang landslide.
863 naman nga nagkalawasak nga hulot-klasehan ang nagakinahanglan nga kay-uhon ukon P2.1 bilyon kag 1,026 ang kinahanglan sang major repairs nga nagabalor naman sang P513 milyon.
Nadulaan man ang mga eskwelahan sang 381,551 nga mga materyales kalakip na ang mga computer, libro kag 17,575 school furnitures, kaangay sang mga lamesa, appliances kag pulungkuan.
Sa kabug-usan, ginsiling sang DepEd nga halos 43,000 nga mga eskwelahan kag opisina ang na-expose sa bagyo, buot sikingon yara sila sa mga lugar kung sa diin naghatag sang pahanumdum ang mga awtoridad batuk sa pagbaha, mabaskog nga pag-ulan, storm signal kag panawagan para sa pre-disaster risk assessment.
Pahayag sang ahensya yara sa 21.4 milyon nga mga estudyante kag halos 900,000 nga mga manunudlo kag empleyado ang yara sa lugar. Matandaan una na nga ginsiling ni Education Secretary Sonny Angara nga ang DepEd, may access sa P2 bilyon tubtob P3 bilyon para sa calamity funds nga mahimo gamiton sa pagpakay-o kag pag-rehabilitate sang mga nawasak nga hulot klasehan kag eskwelahan.
