ROXAS CITY – Nagapadayon ang pagpamakal sang National Food Authority sang palay sang mga mangunguma sa probinsya sang Capiz.
Ini ang ginpahayag ni Capiz NFA Assistant Provincial Director Aurelio Villasis sang ma-interview sang Bombo Radyo.
Suno kay Villasis nga may bastante nga pondo ang NFA sa pagpamakal sang humay sang mga mangunguma.
Ginpahayag pa sini nga nagasunod sila sa mandatu ni Presidente Rodrigo Duterte nga baklon ang palay sang mga local farmers.
Ginpahayag ni Villasis nga masobra sa P117.3 milyones ang nagasto nga pundo sang NFA para sa pagpamakal sang humay sa probinsya sang Capiz.
Ang nasambit nga pundo ang natigayon nga makabakal sang kapin 123,189 ka sako sang humay gikan sa mga mangungoma sa bug-os nga probinsya sang nagligad nga bulan sang Oktubre.
Sa sini nga bulan sang Nobyembre, target naman sang NFA nga makabakal sang 90, 000 ka sako sang humay apang sa karon pa lamang yara na sa 67 porsyento ang nabakal sang NFA bangud tuman ka damo nga mga mangunguma ang nagabaligya sa ila bangud sa mataas nga presyo sang ila pagpamakal.
Gindugang ni Villasis nga nagabakal ang NFA sang palay sa tag P19 tagsa ka kilo sang uga kag matinlo nga humay, samtang ang presyo sang pagpamakal sang humay sang mga pribado nga negosyante ang yara lamang sa P11.59 tubtob P13.90 tagsa ka kilo.
Sa karon ginapasalig ni Villasis nga may yara sang bastante nga bodega ang NFA nga pagpahamtangan sang mga palay nga mabaligya sa ila sang mga local farmers.
