Nagalapta sa social media kag ginahimuan pa sang memes ang laragway sang isa ka kuwarto, bangud sa isa ka viral nga balita sa China sang damlag lang.
Kun lantawon ang nasambit nga kuwarto, “nothing special” ang makit-an diri; isa lang ini ka simple nga kuwarto nga may built-in cabinets, hiligdaan, lamesa kag naka-tiles man ang salog sini.
Apang ang istorya sa likod sang amo nga kuwarto, ini ang “headquarter” ni Red Uncle, 38-anyos, ang lalaki nga nagapakuno-kuno nga babaye agud makighilawas sa masobra isa ka libo nga lalaki kag makuhaan sang video ang sekswal nga hilimuon kag para makwartahan.
Nagapakuno-kuno man siya bilang “sweet, divorced woman” kag madamo naman sa mga lalaki ang ginapahayag nga iya natuntuhan kag nakasulod pa sa sulod sang kuwarto agud ihatag sa iya ang “offer” nga grocery items, toiletries, pagkaon, prutas, ukon iban pa nga bagay kabaylo nga “makaiskor” sa iya.
Apang wala nakahibalo ang mga lalaki nga may naka-set-up nga sikreto nga camera nga naga-record sang sekswal nga himuon niya sa ila. Pagkatapos sini, ang video ang ginabaligya niya sa online lipod sa ihibalo sang mga lalaki.
Nakaabot sa mga otoridad ang ginahimo ni Red Uncle gani gilayon nga gin-raid ang iya nga apartment. Nagserbe nga ebidensya ang mga make-up, peluka, kag ang camera nga ginagamit niya sa pasikreto nga recording sang sexual video.
Nahibaluan nga sandig sa layi sang China, may nagakaigo nga penalidad ang pagpalapta sang mga pribado nga video ukon laragway nga nagapakita sang sekswal nga hilimuon.
