Gin-anunsyo ni Ombudsman Jesus Crispin Remulla nga mahimo ma-issue sa sulod sang masunod nga duha ka semana ang arrest warrants batok sa mga senador nga gina-alegar involved sa mga iregularidad sa flood control projects.
Ginhimo sini ang pahayag sang ginpamangkot kun mahimo na nga mag-isyu sang arrest warrant subong nga Christmas season, matapos nga gin-isyu ang warrant batok kay Former Ako Bicol Rep. Zaldy Co.
Sa pihak nga bahin, gintumod ni Remulla ang kaso ni anay Sen. Ramon “Bong” Revilla Jr. nga “low-hanging fruit.”
Madumduman nga nalakip si Revilla sa rekomendasyon sang Independent Commission on Infrastructure (ICI) sa Office of the Ombudsman para sa posible nga kaso kriminal may kaangtanan sa mga iregularidad sa flood control projects, kaupod ang siyam ka iban pa nga mga indibidwal.
Gintumod sang ICI ang mga posible nga paglapas kaangay sang pagpangawat, direkta ukon indi direkta nga pagpanghamham, korapsyon sang mga opisyal sang gobyerno, kag mga kaso administratibo.
Samtang nagpabutyag naman sang pagkadismaya ang kampo ni Revilla. Suno sa iya spokesperson nga si Maria Carissa Guinto, wala nakabaton sang subpoena ukon pormal nga reklamo ang anay senador kag wala man ginhatagan sang tsansa nga magsabat sa mga alegasyon.
Ginbuyagyag ni Remulla nga nagapatigayon na sang case build-ups ang iya talatapan batok sa pila ka mga high-profile officials nga gina-alegar involved sa kontrobersiya nga ginalakipan nanday Sen.Francis Escudero kag anay Sen.Nancy Binay.
Matandaan, una na nga ginpanginwala nanday Senator Escudero kag Binay ang mga alegasyon.
Nahibaluan nga ang ICI referrals ang base man sa mga affidavit kag testimonya, lakip na ang kay anay DPWH Undersecretary Roberto Bernardo sa tion sang Senate Blue Ribbon Committee hearing sang nagligad nga Setyembre.
