Indi apektado ang provincial administrator sa ginpapasar nga resolution sang Sangguniang Panlalawigan nga naga-deklara sa iya bilang Persona Non Grata sa tanan nga talatapan sang mga board members kag session hall.
Ini ang ginpahayag ni Provincial administrator Edwin Chinel Monares sa exclusive interview sang Bombo Radyo.
Suno kay Monares nga wala ini nakibot sa nangin tikang sang sanggunian bangud kasubong nga madugay na niya ini ginalauman.
Ginpahayag pa sang opisyal nga sa baylo maapektuhan, nalipay pa ini bangud kasubong ginpakita sang nagduso sang nasambit nga resolution nga si SK Federation President Renzo Teves nga nagatrabaho ini kag indi pareho sadto nga kasubong ini sa na-comatose nga wala sang may ginahimo para matamdan ang iya nga katungdanan.
Nagapati si Monares nga si Board member Jonathan ‘’Sonny’’ Besa ang yara sa likod sini tanan sa handum nga ma-dominahan ang mga kaupdanan kag matuman ang ambisyon nga mangin bise gobernador.
Ginklaro pa sang opisyal nga wala ini nagakontra kay Besa kun sa kaayuhan kag ensakto lamang ang iya ginahimo, apang masami wala na sa lugar kag madamo na ang naapektuhan.
Ginapanindugan pa sini nga indi siya apektado kun wala na sang salig kag akig sa iya ang Sangguniang Panlalawigan labi na si Besa, bangud indi sila kundi ang gobernador sang probinsiya ang nagpahamtang sa iya sa posisyon, gani ini lamang ang makapahalin sa iya.
Nahibaluan nga nakalab-ot na kay Governor Esteban Evan Contreras II ang pagdeklara nga persona non grata kay Monares sa diin ginpalab-ot sini sa gobernador nga okey lamang siya kag indi dapat problemahan.
