ROXAS CITY, CAPIZ – Hugot nga ginapatuman sang Traffic Management Unit-Roxas City ang pagdakup sang mga colurum nga nagabyahe sa palibot sang syudad.
Sa interview sang Bombo Radyo kay Gonzalo Andrada, Head sang Traffic Management Unit-Roxas City, iya ginpahayag nga madamu sang mga nabaton nga mga reklamo ang ila talatapan angot sa mga colorum gikan sa mga tricycle nga may kaugalingon nga city number kun sa diin may epekto sa ila nga pang adlaw-adlaw nga kita.
Suno kay Andrada, madamu ang ila mga personnel ang naka-deploy sa mga mayor nga dalan sa palibot sang syudad agud magbantay kag magdakop sang mga colorum.
Pahayag pa niya, kalabanan sang mga nagabyahe nga colorum ang indi tumandok sang syudad sang Roxas rason nga maiwat para sa ila nga i-identify ang eksakto nga address sang mga nasambit nga violators.
Samtang, padayon man ang kampanya kag pagdakop sa mga motorista nga wala nagasuksok sang helmet kag nagabyahe nga wala sang drivers license.
Nagpanawagan man ang natungdan sa publiko sang kooperasyon agud mapabilin ang katawhay sang dalagan sang trapiko sa syudad sang Roxas.
INTERVIEWED BY: BOMBO RAODNIE DALANON
