Roxas City- Ginabasol sang pamilya Bataican ang pamunuan sang Bailan Distict Hospital bangud sa kapaslawan nga mahatagan sang pagtamud ang ila pasyente nga nagbun-ag sang pito ka bulan nga triplets nga lapsag. Sa interview sang Bombo Radyo Roxas kay Mrs. Arcely Bataican, lola sang tatlo ka lapsag ginapahayag sini nga napatay ang duha sa tatlo ka mga lapsag bangud sa kapabayaan sang mga nurses sang nasambit nga ospital. Suno kay Arcely Mayo 13 sang nagpasakit ang iya nga umagad nga asawa sang anak nga si Reyland Bataican sa nasambit nga ospital.
Nagdesisyon ang pamilya nga ipa-ultrasound ang ila nga pasyente para mahibaluan ang sitwasyon sang iya ginadala sa tiyan. Apang wala sang ultrasound apparatus ang ospital gani gin-refer na lamang sila sa ospital sa syudad sang Roxas. Wala nagalaum ang pamilya Bataican nga tatlo ka mga lapsag ang ginabusong sang pasyente sa diin sa ultra sound lamang nila natukiban nga triplets ini. Matapos sang ultrasound sa Roxas Memorial Provincial Hospital, ginbalik ang pasyente sa Bailan District Hospital tobtob ginsakitan ini kag ginpaidalum sa caesarian operation bangud indi masarangan sang pasyente ang normal delivery. Ginpahayag dugang ni Arcely nga matapos ang operasyon buhi pa ang tatlo ka mga lapsag apang natabuan nga wala sang bakante nga incubator sa amo nga ospital. Naglain pa ang buot sang lola matapos nagbuhi sang tinaga ang mga nurses nga wala sila sang mahimo bangud puno ang tanan nga mga incubator sang amo nga ospital.
Wala mauyunan sang lola ang ginhimo sang duha ka mga nurses nga ginpihak ang container sang mineral water, ginbuhuan kag ginbutangan sang suga kag ginpatuon ang suga sa mga lapsag. Indi mapat-ud sang pamilya Bataican kun ang ginhimo nga pamaagi sang mga nurses ang may pahanugot gikan sa doktor.
