ROXAS CITY – Ginapanindugan sang board member gikan sa segundo distrito sa probinsiya sang Capiz ang pagpamatuk kag pagkwestyon sa appointment ni Dr. Edwin Monares bilang Provincial Administrator.
Ginpahayag ni Board Member Matthew Hachuela, ang iya lamang ginakwestyon amo ang residency ni Monares nga wala sang dugo nga Capiznon kag indi isa ka Capiznon.
Para kay Hachuela nga wala malab-ot ni Monares ang residency requirement para mangin provincial administrator sa diin indi balasehan nga nag-estar ini sa probinsiya sang Capiz sa sulod sang pila ka tuig, bangud importante nga may dugo nga Capiznon sa magaserbe nga administrador sang probinsiya.
Suno pa kay BM Hachuela nga bangud ginakabig nga little governor ang provincial administrator, kinahanglan nga may dugo ini nga Capiznon agud maintiendihan ang kostumbre kag pinamatasan sang mga Capizeno.
Ginklaro man sang opisyal nga wala sini ginakwestyon ang pagpahamtang kay Monares ni Governor Esteban Evan Nonoy Contreras bangud ginarespeto sini ang desisyon sang gobernador.// Subongman, indi kwestyon ang kwalipikasyon ni Monares, bangud kwalipikado ini, apang para kay Hachuela nga dapat isa ka true blood Capizeño ang mangin provincial administrator kag indi ang nagpadulong lamang sa probinsiya kag nag-establisar sang iya kaugalingon.
Wala man napunggan ni Hachuela nga magpalayag nga madamo man nga mga Capizeño ang kwalipikado sa posisyon bilang provincial administrator.
Samtang ginpasalamatan man sang opisyal ang mga kaupdanan nga mga board members sa pagrespeto man sa iya nga desisyon nga indi pagpabor sa pagpahamtang kay Monares bilang provincial administrator.
