ROXAS CITY-Ginkompirmar ni City Councilor Moreno Gonzaga nga may yara sang suspect case nga liwat nga ginlubong sang Roxas City Emergency Response Team sa Cagay Public Cemetery kahapon nga adlaw nga wala sang koordinasyon sa barangay.
Gin-athag ni Gonzaga nga wala sang komosyon nga natabo sa tunga sang mga katapo sang RCERT kag mga barangay opisyales sa baylo isa gid lamang ka diskusyon.
Suno sa kay Gonzaga nga ginkuwestion sini kun may yara sang nakaigo nga dokumento kag koordinasyon sa barangay ang pagpalubong sa nasambit nga pato sang 15-anyos nga bata nga SUSPECT CASE nga residente sang Barangay Culajao sining siyudad.
Ginpanindugan ni Gonzaga nga wala sang koordinasyon ang RCERT sa barangay bangud mangin si Punong Barangay Arturo Aragon Sr ang wala man nakahibalo natuhoy sini.
Ginkuwestion man sini kun ngaa ang care taker sa nasambit nga patyo ang nagasirado sang pantyon sa pihak nga wala ini sang nakaigo nga mga PPEs.
Gin-athag ni Gonzaga nga wala nagapamalabag ang barangay sa pagpalubong sang mga napatay nga mga SUSPECT kag positive case sa nasambit nga patyo, apang luyag gid lamang mapasiguro nga nagasunod sa tama nga protocol ang paglubong sa mga napatay.//
Samtang nagkasugot naman si Gonzaga kag pamunuan sang RCERT nga magkoodinar sa ila sa tion nga may yara sang inuglubong nga mga suspect kag positive case sa Cagay Public Cemetery.
