Wala sang may nabalhag nga casualty matapos ang pagpang-atake sang Iran sa Ras Laffan Industrial City sa pungsod Qatar sang Marso 18, 2026.
Suno kay Bombo Joseph Timothy Rivera, International Correspondent, direkta sa Qatar, iya ginpahayag nga lima ka mga missile ang ginlunsyar sang Iran apang na-intercept sini ang apat kag isa lang ang nag-igo sa nasambit nga pasilidad.
Bangud sa pagpang-atake nagtuga ini sang sunog kag tuman nga kahalitan sa mga pasilidad sang Liquified Natural Gas (LNG) sang Qatar.
Pahayag pa niya, nagpamahog man si US President Donald Trump nga bombahon nila ang South Pars gas field sang Iran kun liwat nga atakehon sang Iran ang energy facilities sang Qatar.
Nahibaluan nga ang Ras Laffan Industrial City isa sa pinakadako nga energy facilities nga nagasupply sang produktong petrolyo sa bug-os nga kalibutang.
Samtang, ginpahalin naman sang Qatari Government ang Iranian Military Attache kag ang Security attache sini bilang balos sa ila nga nangin aksyon.
Nagpanawagan naman ini sa mga natungdan nga kuntani tapuson na ang amo nga kinagamo agud magbalik na sa normal ang hulag sang piso kontra dolyar.
