ROXAS CITY – May suspek na ang mga opisyales sang barangay natuhoy sa pagpangawat sang motorsiklo nga nagluntad sa Barangay Mongpong.
Ini ang ginkumpirmar ni Kapitan Ricky Donato, sang mainterview sang Bombo Radyo, suno diri igatugyan sini ang responsibilidad sa kapulisan bangud sila ang may sarang nga mag-imbestigar sa nasambit nga insidente.
Padayon man suno diri ang pagpatigayon sang ila barangay sa pagbantay kag wala sila nagapabaya sa pagpabilin sang peace and order.
Dugang pa ni kapitan nga ang suspetsado indi tumadok sang syudad apang may mga pamilya ini diri nga tiniran.
Estilo sang makawat ang hulaton nga matapos ang pagpatrolya sang mga Tanod antes ini maghimo sang indi amu gani pabugal ni kapitan nga may yara man sila sang estilo maluwas sa pagronda agud matapna ang mga insidente.
Plano man sang Punong Barangay nga ibalik ang CCTV matapos mawasak ini bangud sa bagyong Ursula apang mas maayo kun ang pumuluyo mismo ang maghalong kag magbantay sa ila tagsa ka puluy-an kag i-safety ang pagkabutang.
Panugyan ni kapitan Donato sa mga pumuluyo sang syudad nga magkooperar, mangin alisto kag kun may makatilingala nga maobserbahan gilayon nga ireport sa ila brgy. agud ila ini maaksyunan.
