ROXAS CITY, CAPIZ- Wala maluyagan sang isa ka Tricycle Driver ang palaabuton nga pagnubo sa presyo sang gatong sang senintimos lang sa masunod nga semana.
Sa interview sang Bombo Radyo kay Ian De Pedro, ang nasambit nga tricycle driver, iya ginpahayag nga indi gid bastante ang amo nga lihok sang mga natungdan.
Suno kay De Pedro, kaangay nga daw nagahampang lang ang mga kompanya sang langis sa ila nga bahin sa transport sector.
Pahayag niya, kuntani dula-on sang gobyerno ang oil deregulation law bangud nga amo ini ang ginatudlo nga dako nga problema sa pagtinaas sang presyo sang gatong sa diin nga tuman sila nga naapektuhan.
Nagapanawagan naman ang natungdan sa iban nga mga commuters nga kaangay nagapamintaha sa ila, nga kuntani magsunod sa ginapatuman nga pagsulundan pag-abot sa pamasahe.
Interviewed by Bombo Sunnie Mae Constantino Batencila
