ROXAS CITY – Ginkumpirma ni National Capital Region Police Office (NCRPO) Chief Director Guillermo Eleazar nga may kaangtanan sa trabaho bilang imbestigador ang pagpatay kay PO2 Cris Robert Castro nga assigned sa karon sa Manila Police District 1.
Sa exclusive interview sang Bombo Radyo Roxas kay Director Eleazar, ginpahayag sini nga isa sa mga ginasunod nga lead sang pulisya sa karon ang may kaangtanan sa droga kag gun-for-hire ang yara sa likod sang krimen.
Ini matapos sang 2016 may nadakpan nga tatlo ka persona may kaangtanan sa iligal nga droga kag ginasiling gun-for-hire si PO2 Castro.
Nakapyansa lamang ang mga ini rason nga nakaguwa, apang ginpaandaman ang nasambit nga pulis.
Suno kay Director Eleazar nga maayo ang record kag performance ni PO2 Castro bilang isa ka imbestigador gani daku ang posibilidad nga may kaangtanan sa iya trabaho ang pagpatay sa biktima.
Samtang nagpanawagan ang opisyal sa sin-o man nga may nahibaluan sa natabo nga krimen nga makig-angut lamang sa mga pulis agud mapadasig ang imbestigasyon sa kaso ni PO2 Castro.
