Ginapahayag nga may yara na sang “person of interest” ang mga kapulisan sa Cuartero Municipal Police Station sa pagpatay sa isa ka senior citizen sa Barangay Mainit, Cuartero.
Matandaan nga ginkilala ang amo nga biktima kay alyas Joselyn nga residente sang nasambit nga lugar.
Base sa imbestigasyon sang mga katapo sang kapulisan, ginapahayag nga may ginasundan na nga persona nga amo ang ginatudlo responsible sa pagpatay sa nasambit nga tigulang.
Pahayag sang mga residente nga may isa ka lalaki sila nga namutikan sa amo nga lugar.
Mahibaluan nga pasado alas 9:00 sang nakaligad nga gab-i, nasapwan nalang ang amo nga biktima nga wala na sang animo kag duguon.
Nag-angkon ini sang madamo nga pilas sa lawas tuga sang pagpangbuno nga gilayon man nga gindala sang mga katapo sang Cuartero Emergency Response Unit sa Dao District Hospital apang gindeklarar nga dead on arrival ang biktima.
Dugang pa nga tubtob sa karon talalupangdon pa ang paglapta sang mga gamit sang biktima kag mga dugo sa iban nga bahin sang iya puluy-an.
Sa karon, nagapadayon ang maid-id nga imbestigasyon sang Cuartero PNP sa nasambit nga insidente.
