ROXAS CITY, CAPIZ– Ginhatagan pagtamod sang Department of Health (DOH) ang padayon nga kampanya batok sa isa sa mga nagapanguna nga balatian sa baga sa pungsod amo ang tuberculosis (TB) kadungan sang pagselebrar sang National Lung Month subong nga Agosto.
Ang tuigan nga selebrasyon ang may katuyuan nga pabaskugon ang ihibalo sang publiko angut sa importansya sang ikaayong-lawas sa baga, partikular na subong nga tuig kun sa diin nakasentro ang atensyon sa paglikaw, pag-examine, kag pagbulong sang TB.
Sa interview sang Bombo Radyo kay Dr. Mark Christian Agase, isa ka Pulmonologist, iya ginpakigbahin ang sitwasyon sa karon sang TB sa pungsod.
Suno sa iya, apisar nga nagnubo na ang kaso sang COVID-19, nagapabilin sa gihapon nga pagpanghangkat sa sistema sang ikaayong-lawas sang tuberculosis. Sandig sa datos, isa sa gihapon ang Pilipinas sa mga pungsod nga may mataas nga kaso sang TB sa bilog nga kalibutan.
Dugang pa sini, importante nga mahibaluan sang publiko nga ang TB ang nagakabulong kag sarang ini nga malikawan, labi na kun ini ang timprano pa nga madiskubre. Suno sa iya, libre ang pagpacheck-up kag bulong sa mga health center sang gobyerno.
Hugot pa sini nga ginsiling nga kun may ubo nga naglapaw na sa duha ka semana, lagnat sa gab-i, ginpamalhas lang kada gab-I, nagnubo ang timbang, magpakonsulta na nga daan.
Sa idalom sang kampanya nga “Yes to TB-Free Philippines”, padayon ang DOH sa pagpatigayon sang community outreach programs, libre nga X-ray screening, kag paghatag sang mga bulong sa mga pasyente.
Bilang kabahin sang selebrasyon, ginlunsyar man ang nagkalain-lain nga aktibidad kasubong sang libre nga konsultasyon, information drives sa mga buluthuan, kag TB awareness caravans sa nagkalain-lain nga rehiyon.
Panugyan naman sini sa publiko nga ipabilin nga mabaskog ang baga pamaagi sa tama nga nutrisyon, paglikaw sa pagpanigarilyo, kag paglikaw sa mga matawo nga lugar kun may sintomas sang TB.
In an interview with Bombo Francis Biñas & Bombo Sunnie Mae Batencila
