ROXAS CITY – Nagalab-ot lamang sa P30 tubtob P50 ang pamasahe kun nagikan sa Roxas City Airport padulong sa San Roque Extension, dako nga deperensya sa ginbayad sang duwa ka pasahero nga nagreklamo bangud ginsukot sila sang P400.
Sa interview sang Bombo Radyo kay Primitivo Arcoleta, Tricycle Driver nga nagapila sa airport, suno diri sobra-sobra ang ginsukot sang tricycle driver sang colorum nga nagdul-ong sa mga pasahero nga kuntani double ride lang ang ginsukot sini P15 aiport padulong capitol kag P15 liwat halin sa capitol padulong San Roque. Ext..
Pahayag ni Arcolita, dapat nga ginasunod sang mga tricycle drivers ang taripa nga P15 bangud nahangpan sini nga apektado man ang mga pumuluyo sang nagataas nga presyo sang pagkaon kag gatong.
Suno diri, aminado siya nga wala na ginasunod sa karon ang taripa bangud man sa nagabaylo nga presyohanay sang gatong, apang wala ini nagamando sa mga pasahero kun pila ang ibayad kag ang pasahero nalang ang ginapamangkot niya kun pila ang ihatag kun sa diin patas kag indi siya mapiyerde amu man ang pasahero.
Dugang pa sini, sila nga may mga lehitimo kag may prangkisa nga drivers ang indi mahimo nga magsukot sang mahal bangud may penalidad ini kun sila ireklamo.
Ginbuyagyag man ni Arcoleta nga ang ginabungad sang pila ka mga tricycle drivers sa mga pasahero antes ini pasakyon kun pila ang ibayad kun sa diin ginakonsiderar niya nga indi manami nga pag-abiabi.
Panugyan sini sa kasubong nga tricycle drivers nga indi magpasober sa pagsukot sang pamasahe kag sundon ang layi.
