ROXAS CITY -Indi kumbinsido ang pamilya sang 28-anyos nga Capizeño nga naghikog ang ila nga himata matapos nga nadulaan sang trabaho bangud sang Enhanced Community Quarantine sa Barangay San Roque, San Tomas Batangas.
Suno kay Mrs. Hayde Escultero, iloy sang biktima nga si Jason Escoltero sang Barangay Tapulang, Maayon, Capiz nga ulihi sini nga naistorya ang anak sang tinalikdan nga Lunes nga adlaw nga nagapangayo sang kwarta bangud wala sang pang-gasto sa Batangas.
Suno sa iloy nga sang bulan sang Nobyembre sang tinalikdan nga tuig nagpadulong sa Batangas si Jason agud magtrabaho apang sang tinalikdan nga bulan sang Marso nauntat ang trabaho sini bangud sang ECQ.
Ginkakibot na lamang sang ginang sang ginbalitaan ini sang iya isa ka anak nga nasapwan na lamang si Jason nga wala na sang kabuhi nga nagabitin sa balayan sang gindayunan sini nga kwarto kag ginapatihan nga nagpanginmatay.
Samtang indi naman makapati ang iloy nga naghikog ang iya nga anak.
Sa karun ginahulat na lamang sang pamilya Escultero ang bangkay sang biktima nga makapauli matapos nga nagpasalig si Capiz Governor Esteban Evan Nonoy Contreras nga buligan ang pamilya sa sitwasyon sang napatay nga himata.
