KALIBO, AKLAN – Ginhimu sang pamunuan sang Civil Aviation Authority of the Philippines-Aklan, ang protocol sa tatlo ka turista sa Kalibo International Airport agud malikawan ang paglapta ang ginakakugmatan nga balatian nga Severe Acute Respiratory Syndrome (SARS).
Ini ang ginpahayag sang CAAP manager nga si Engr. Eusebio Monserrate Jr., sang ginpatigayon nga tie-up broadcast sang Bombo Radyo Iloilo, Roxas kag Kalibo.
Suno kay Engr. Monserrate, ang tatlo ka Chinese nationals ang nagasuprer sang hilanat, nga isa sa ginasiling sintomas sang amo nga balatian.
Apang ginklaro sang opisyal nga wala naghalin sa Wuhan, China ang nahinambitan nga mga Chinese nationals nga nagbisita sa Kalibo.
Nahibaluan gikan kay Monserrate nga antes pa man nakapanaog sa eroplano ang mga pasahero, ginapaidalom sila sa inspection paagi sa Thermal scanner.
Samtang ginpahayag sa Bombo Radyo ni Dr. Cornelio Cuachon sang Aklan Provincial Health Office, nga ang 29 anyos nga Chinese national ang labing una nga ginpaidalom sa hospital quarantine, ginsundan sang tatlo ka tuig nga bata kag ang pinaka-ulihi amo ang 65 nga tigulang.
Suno kay Dr. Cuachon, ang tatlo ka mga turista ang gindala sa Dr. Rafael S. Tumbukon Memorial Hospital para sa medical examination kun sa diin outpatient na ang 29 anyos nga pasyente samtang nagapabilin naman sa hospital ang 65 anyos nga tigulang.
Ginpahayag ni Dr. Cuachon nga ginkuhaan sang blood samples kag specimens ang tatlo kag ini ang ginpadala sa Research Institute for Tropical Medicine sa Manila para sa testing.
Sa pihak sini, nagpanugyan si Dr. Cuachon sa mga pumuluyo nga likawan ang pagsalangisag kag mas makapaayo nga mag-inom sang madamu nga tubig kag multi-vitamins.
Sa karon yara sa red alert status ang Aklan Provincial Health Office matapos gin-quarantine ang tatlo ka Chinese nationals nga ginadudahan may yara sang SARS-like pneumonia virus.
Nauna na nga ginpahayag sang World Health organization nga ang virus nga nagatuga sang misteryoso nga balati-an ang nalakip sa coronaviruses kasubong sang Severe Acute Respiratory Syndrome nga nagpatay sang ginabanta 800 ka tawo kadungan sang outbreak sang 2002 nga nag-umpisa sa China.
