ROXAS CITY – Ginpabugal sang passer sa April 2023 Civil Engineering Licensure Examination nga bangud sa basura, nakatapos ini sa pag-ekwela kag isa na ka Enhinyero.
Sa interview sang Bombo Radyo kay Engr. Fedie Tabaquirao, hinipo sa lima nga mag-ulutod kag residente sang Brgy. Nasunogan, Dao, Capiz, ginpahayag sini nga wala nagsulod sa iya pinsar nga ikahuya ang trabaho sang iya Amay, sa baylo, nangin inspirasyon ini sa iya nga mangin isa man ka propesyunal kaangay sa iya apat ka mga utod.
Nag-abot man suno diri ang tion nga ginkulang sila sa pinansyal, bangud apisar nga Teacher 1 ang ila Iloy, may mga utod man ini nga naga-eskwela pa sadto anay, apang wala ini nakabati sa iya ginikanan nga mag-untat nalang sa pagtuon.
Bangud sa estado sang ila sadto anay nga pangabuhi, ini ang nagtulod kay Tabaquirao nga magtimakas sa pagtuon.
Sa karon, luyag sini nga ibalik sa iya mga ginikanan ang ila nangin kabudlay agud lamang mahatagan sila nga mag-utod sang maayo nga buwas-damlag.
Wala man ini nagkalipat nga pasalamatan ang Ginoo kag ang mga tawo nga yara sa likod sang iya kadalag-an.
Kun sadto anay nagapamalat-balay ang iya Amay sa pagbakal sang mga guba nga ref, aircon akun ano pa nga basura, sa karon, tag-iya na sila sang isa ka junk shop sa ila lugar.
Mensahe man sini sa mga wala ginkaluy-an nga makapasar sa pasinawan nga “rest if you must, but do not quit.”
