Patay ang 33-anyos nga lalaki, matapos ginlabo sa Barangay Hilwan, Tapaz, Capiz.
Ginkilala ang biktima kay alyas “Totong” samtang, ang ginatudlo naman nga suspek ang ginkilala kay alyas “Baste”, 35-anyos kag lunsay mga residente sang nasambit nga lugar.
Sa inisyal nga impormasyon nga nakuha sang Bombo Radyo nagikan sa Tapaz PNP, ginpahayag nga personal nga nagpadulong ang isa ka Barangay Kapitan agud ipabalhag nga may nagluntad nga pagpanglabo sa iya nga barangay.
Ginpahayag sini nga samtang nagakay-o ang biktima sang kanal sa iya nga uyapad, hinali nalang ini nga ginpalapitan sang suspek sa likod kag gulpi ginhatok-hatok labo sa magkatuhay nga parte sang lawas.
Bangud sa natabo, nag-angkon sang kapilasan ang biktima sa nagkalain-lain nga parte sang iya kalawasan rason nga ginbawian ini insigida sang kabuhi.
Madasig naman nga nagpalagyo sa lugar ang suspek matapos nakumiter ang krimen.
Sa karon, padayon nga nagapatigayon sang hot pursuit operation ang mga kapulisan batuk sa nasambit nga suspetsado.
