Ginbawian sang hulam nga kabuhi ang 53-anyos nga lalaki matapos ginapahayag nga nabungguan sang salakyan sa Barangay Poblacion Ilawod, Dumarao, Capiz.
Ginkilala ang biktima kay alyas “Jun” kag residente sang nasambit nga lugar samtang ang ginatudlo naman nga driver-suspek ang ginkilala kay alyas “Junior”, 53-anyos, residente sang Aklan kag drayber sang Mitsubishi Adventure nga salakyan.
Sa interview sang Bombo Radyo kay PCPT Tobias Garfin, Officer-In-Charge sang Dumarao MPS, ginpahayag sini nga samtang ginasubay ni alyas “Junior” ang dalanon sang nasambit nga lugar, ginapahayag nga hinali nalang sini nga nabungguan si alyas “Jun”.
Dugang pa sini, nagikan sa syudad sang Iloilo si “Junior” kag padulong kuntani sa probinsya sang Aklan apang pag-abot sa ginluntaran sang aksidente, hinali nalang ini nga nakabunggo kag dugang pa nga wala nya ini nadiparahan nga ini ang nagtabok.
Gilayon naman nga nagrespondihan ang mga otoridad kag gindala sa Dao District Hospital ang biktima apang makaligad ang pila ka minuto gindeklarar ini nga ginbawian sang hulam nga kabuhi.
Nahibaluan nga yara sa impluwensya sang makahulubog nga ilimnon si alyas “Jun”.
Sa karon, yara na sa kustodiya sang Dumarao MPS ang driver sang amo nga salakyan para sa nagakaigo nga disposisyon.
