TALISAY CITY, NEGROS OCCIDENTAL- Isa ka bangkay sang lalaki ang nakita sa sulod sang isa ka nakaparada nga kotse sa Talisay City, Negros Occidental. Apang ang bangkay, indi kilala sang tag-iya sang salakyan.
Sa isa ka report, ginsiling nga nadiskubre ang bangkay sa Barangay Efigenio Lizares.
Suno sa mga kapulisan, isa ka residente ang naka-agi sa nakaparada nga salakyan kag may napanimahuan nga malangsa nga naghalin sa sulod sang salakyan rason nga gin-report ini sa otoridad.
Sang ginbuksan ang salakyan nga tinted, didto na nakita ang bangkay sang lalaki nga nakapuwesto sa driver’s seat.
Nahibaluan nga wala na ginagamit sang tag-iya ang salakyan rason nga nakaparada lang sa lugar.
Ginpahayag man sang tag-iya nga indi niya kilala ang lalaki, kag suno sa iya, wala man sang lock ang salakyan.
Padayon ang imbestigasyon sang mga kapulisan kag paga-chekyaron ang mga closed-circuit television (CCTV) camera nga malapit sa lugar.
