Hugot nga nagpaandam si Punong Barangay Roberto Ross Roldan sang Barangay Adlawan, Roxas City sa iya pumuluyo nga mag-andam kag mangin aligmat sa tanan nga oras agud malikawan nga mangin biktima sang mga kawatan.
Ini matapos liwat naman nga nagatuhaw ang mga indibidwal ukon grupo sang mga gamhanan nga nagapangsulod-sulod sa mga panimalay ukon mga balaligyaan agud makapangawat.
Suno kay PB Roldan, mas maayo nga mangin preparado bangud base sa mga nagakatabo subong wala ini sang may ginapili nga panahon.
Panugyan sini nga kung mahimo magbilin sang isa sa mga pamilya sa puluy-an kung maglakat, siguraduhon ang mga padlock sang pwertahan, bintana, kag mga kudal nakasarado, likawan nga magpahamtang sang mga gadgets ukon bag malapit sa bintana kag pwertahan, kag mas maayo nga magpahamtang sang cctv agud madasig nga madakpan kag makilan-an ang mga indibidwal nga yara sa sini nga buluhaton.
Mahibauan nga base sa datos sang mga otoridad, asud-asud na ang mga nagareport nga nabiktima sang kawatan kag madamo naman nga butang ang nataban sang mga wala pa makilan-an nga persona.
