CAPIZ – Padayon ang mabaskog nga kampanya sang Philippine Drug Enforcement Agency-Capiz batok sa iligal nga droga sa probinsya sang Capiz.
Ini matapos ang asud-asud nga drug buy-bust operation nga ginpatigayon sa nagkalain-lain nga bahin sang probinsya.
Sa interview sang Bombo Radyo kay Mr. Jury Rocamora, Investigation Agent V kag Provincial Officer sang Philippine Drug Enforcement Agency-Capiz, iya ginpahayag nga ang mga drug buy-bust operation ang natigayon sa bulig sang mga katapo sang kapulisan kag Provincial Drug Enforcement Unit.
Suno kay Rocamora, lunsay mga street level individual ang ila nagkaladakpan lakip na sa banwa sang Pontevedra, banwa sang Ivisan, banwa sang Panay kag Barangay Tiza kag Barangay Banica sa syudad sang Roxas.
Pahayag pa niya, ang “methamphetamine hydrochloride” ukon shabu ang nagapanguna nga iligal nga droga kun sa diin nagataas ang gramos nga nakumpiska sa kada tuig.
Nahibaluan nga sa syudad sang Roxas, nagapabilin ang Barangay Punta Tabuc, Roxas City nga nagapanguna sa ginakabig Barangay hotspot nga ginasundan sang Barangay Banica base sa lokasyon, kadamuon sang populasyon, kag aktibidad sa lugar.
Nagapanawagan man ang natungdan sa publiko nga magkooperar sa mga otoridad agud matapna na ang paglapnag sang iligal nga droga sa palibot.
