Gin-enggango sang Philippine Stock Exchange Inc. (PSE) ang Social Security System (SSS) kag ang Government Service Insurance System (GSIS), nga labi pa nga pabaskugon ang ila partisipasyon sa stock market.
Tinutuyo sang PSE nga engganyuhon ang SSS kag GSIS nga buhion liwat kag palaparon ang mga programa sa pagpautang nga nagatuyo sa pagsuporta sa stocks investment para sa ila minilyon ka mga miyembro.
Suno kay PSE President Ramon Monzon, ang ini nga promosyon may importante nga katuyuan: sa pagdugang sang liquidity, ukon ang kadasigon sang paghulag sang kuwarta, kag sa paghatag sang mas daku nga kapagsik sa lokal nga stock market.
Sa idalom sini nga proposal, ang mga katapo sang SSS kag GSIS may kahigayunan nga magbakal sang pinili nga mga blue-chip stocks, nga ginakilala bilang pila ka pinakamalig-on kag masaligan nga mga kumpanya sa pungsod.
Ang SSS ukon GSIS ang maga-akto bilang trustee tubtob nga lubos nga mabayaran sang miyembro ang kantidad nga utang sa nasambit nga investment.
Dugang pa, ang PSE aktibo man nga nagapasanyog sang pagtingob sang nasambit nga programa sa idalom sang Personal Equity and Retirement Account (PERA).
Ang ini nga tikang nagatuyo sa pagpasangkad kag pagdugang sang mga mandatory nga benepisyo nga nabaton sang mga mamumugon sa pungsod, nga nagabukas sang dalan sa pagtukod sang mas mabakod kag mapag-on nga local bourse ukon stock market.
