ROXAS CITY – Ginpaiway ang pila ka mga nakalinyada nga aktibidad sa pagselebrar sang Capiztahan 2020 sa bulan sang Abril magluwas na gid lamang sa flag raising ceremony, misa kag wreath laying ceremony sa monumento ni anay Presidente Manuel Roxas.
Ini bangud sang padayon nga pagsaka sang kaso sang Coronavirus Disease (COVID-19) sa pungsod.
Suno kay Capiz Governor Esteban Evan Contreras II nga ginhimo sini ang desisyon matapos ginkunsulta ang mga stakeholders nga nagtambong man sa ginpatawag nga Inter-Agency meeting sa isa ka convention hall sa Pueblo de Panay sa Barangay Lawaan, Roxas City.
Ginpahayag ni Contreras nga may yara kuntani sang kapin 30 ka mga aktibidad ang nakalinyada sa pagselebrar sang Capiztahan 2020 bilang ini ang iya pinakauna nga pagselebrar bilang amay sang probinsya.
Apang bangud sang pamahog sang COVID-19 ginpakamaayo sini kag sang pila ka mga natungdan nga ahensya nga ipaiway na lamang ang mga aktibidad nga pagatambongan sang mga tawo.
Dako naman ang pagsalamat sang gobernador sa mga stakeholders nga nag-intindi bangud indi lipod sa iya ihibalo nga nakapreparar naman ang halos tanan para sa ila nakalinyada nga aktibidad.
Samtang dako naman ang mabulig sang pagpa-iway sang pila ka mga aktibidad sa Capiztahan agud mapunggan nga makasulod sa probinsiya ang COVID-19.
Bangud diri, nagpanugyan ang gobernador sa publiko nga kun mahimo maghalong kag indi magkahadlok sa pamahog sang nasambit nga balatian.
Ginalauman naman sang gobernador nga sa masunod nga semana may yara na sang preparedness plan batok sa COVID-19.
Nagapasalamat naman ang gobernador nga lunsay negatibo ang walo ka mga Persons Under Investigation sa probinsya batuk sa amo nga balatian.
