ROXAS CITY – Pabor ang pila ka driver sang Public Utility Jeepney sa Roxas City Integrated Transport Terminal sa mandato sang Department of Transportation nga random drug testing.
Sa interview sang Bombo Radyo kay Antonio Mayo, driver sang jeep nga may ruta Cuartero-Dao-Roxas City vice versa, iya ginpahayag nga pabor siya sa random drug testing agud mahibaluan kun sin-o ang nagagamit sang iligal nga droga kag ang mga pasahero indi mabutang sa alang-alang.
Suno kay Mayo nga halos tanan sini nga kaupdanan nga driver ang nagapasugot man sa nasambit nga mandu bangud sila ang nagadala sang kabuhi sang pasahero.
Matandaan nga naghatag sang mandato ang Department of Transportation sa pagpatigayon sang regular drug testing sa mga PUV driver kasunod sang karambola sa Subic Clark Tarlac Expressway (SCTEX) kag ramming incident sa Ninoy Aquino International Airport Terminal 1.
