PILAR, CAPIZ- Gin-athag sang Bureau of Fire Protection sa banwa sang Pilar nga ginhungod sug-an sang tag-iya ang kampo sang tubo sa Brgy. Santa Fe, Pilar, Capiz.
Sa interview sang Bombo Radyo kay SFO3 Selvino Ross Jr., Acting Fire Marshall sang BFP-Pilar, ginpahayag sini nga kinaandan na ukon tradisyon sa amo nga lugar nga pagkatapos pangtapas sang tubo, hungod nga ginasug-an ang kampo agud preparasyon sa pagtanom liwat.
Dugang pa sini nga wala man sila sang nabaton nga impormasyon ukon report nga may natabo nga grassfire sa nasambit nga lugar apang sang ila nakit-an ang video nga pagkasunog sang katubuhan nga naglapta online, gilayon nila ini nga ginpadulungan ang lugar apang pag-abot sang mga bombero napalong na ang kalayo.
Panugyan ni SFO3 Ross sa publiko nga kun may kasubong nga insidente unahon gid kun mahimo ang pagtawag ukon pag-report sa Buerau of Fire Protection antes mag-post sa social media agud madasig nga marespondehan ang sunog.
Ginpasiguro man sini nga preparado ang Pilar-BFP sa anuman nga oras agud respondihan ang mga insidente partikular na ang sunog.
